Mara Krizyhpa Hlabu Website Pathliepa a châ

Chhâzy vaw sie laih ta, ato zydua he a chatlie kawpa ta â thla lymâ. Hlazy chhao he hlâno ta cha châbu lia chhao roh leipa ta pakha phipa kha mo pakha nah mo pakha amâ vaw pachu pachhuah laih. Daihti riepi a vaw sie laih tita, hla phituh chaipa khizaw tawh a khô tawhta ano hla phi chiehpa kha ano hla a phipa hawh tlaita âdo kawpa ta vaw châ khao leipa ta bâh bâh ta â vaw nano laih. Cha cha hla bie nata solfa rohpa a châ leipa vâta a châ. Keimo chhâtliasawzy ta eima pahno hmâ khao leipa manômahpawzy ta ama vaw phipa hla hluhpi a lei hawpazy chhao a y thei aw.

Châhna chhâ vaw châ ta, a thaiso viapazy ta châhna lia hlabie vaw roh ei ta, hla he a phituhpa ta a phipa aony hawhta moto ta ama sa thei nawpa ta Solfa chhao ta vaw roh ei ta, cha tawhta hla he a phituhpa ta a phipa hawhta mota ta eimâ vaw hly thei haw.
Chavâta Mongyuh nahzy, nata khizaw kaoki liata hla phapazy he reih hro, reih nano lâta paliepa ta sa theipa a vaw châ haw. Keima Mara Krizyhpa Hlabu chhao he Marapa hla phituhzy ama phipa hlazy dei châ leipa ta, reih hro tawhta paliepa hla hluhpizy chhao â hlao hra.

Tâhmâ chhâ lia cha ao pangiana (audio recorder), hla nahthliena (music player) chhaichhizy hleikhô ta, pôhpa a pielaotheipa mopâ theipazy (video) vaw pua ta, hlazy he anaota ta eima nahthlie thei haw.
Kôzabie 21 eima vaw tlô tita, ato zydua he computer ta sai raihriapa a vaw châ khai haw. Keimo Marasawzy chhao Khazohpa ta â hnai chaipa tawh miah cheihchalo ta, Marasawzy pi supi râhpi tlôpa ta, eima Awnanozy poh ozy eima pakawh laih. A hleikhô ta, eima ti nah tlâh lia chhao he Achhyno O rônahpa byhnâ topa ta, Computer, Projector hmâpa ta hla he eima vaw mo thei haw bâ.

Anodeikua, Mara Krizyhpa Hla Website-zy a vaw y mâh leipa vâta rairuna eima tyh kaw tyh. Cha rairuna cha pathlâ awpa ta, Mara Krizyhpa Hlabu website cha Abeipa baona vâta hlaotloh kawpa ta pahy hawpa a châ. He liata angiapa ta, mo theipa a châ: https://mkhb.maralyrics.com

He he papua tua chaipa a châpa vâta apâna nata tloh leina hluhpizy a y aw.